鄭伊健最近趕拍同黎明合作嘅新戲《雙雄》，噚日伊健朝早七點幾就喺英皇道一幢住宅大廈嘅平台拍槍戰同吊威吔戲份，點知拍到晏晝十二點幾，有位外籍住客報警投訴，話劇組未經佢同意，喺佢住嘅大廈拍戲，重話太嘈造成騷擾。

多次報警
警察到場後，嗰位住客要求警方調查同勒令劇組收機，電影公司負責人就向警方出示許可證，證明大廈業主立案法團同意佢哋喺度拍戲，警察見狀就收隊走人，劇組亦繼續開工。點知個外籍人士唔死心，又打多次電話報警，如是者報咗兩、三次警，警察都冇佢符。
馮仁昭見到伊健着住套西裝坐喺一邊等埋位，佢無奈咁話：「我都知有人投訴，聽聞係個外國人，話我哋拍槍戰戲砰砰聲嘈住佢嘛，我哋都差唔多拍完啦，又依正手續搞嘅，差佬都話係個外國人有問題。」

陳加玲憂肺炎無心竹戰
陳加玲前晚去中環dragon-i個party時，大呻因為非典型肺炎肆虐，𠵱家佢連去蒲同買嘢嘅心情都冇埋，陳加玲話：「呢排多數留喺屋企，麻雀都打少咗。」
問陳加玲點解好似唔見佢出席雀友寶詠琴嘅葬禮？佢話：「我嗰日包到實一實，你哋認唔到我啫。」

E-Kids整喊女歌迷
組合E-Kids噚日喺九龍塘某籃球場幫廣州電視台拍攝宣傳片段，現場吸引咗十幾個歌迷圍觀，其中阿Tim嘅女歌迷重突然喊起上嚟，要Tommy走過去安慰佢，阿Tim之後解釋話：「個女歌迷話我唔記得佢叫乜嘢名，所以喊啫。」