現年42歲嘅韓流始祖裴勇俊原本就話今年秋天迎娶旗下公司Keyeast嘅藝人朴秀珍，點知前日就忽然傳出消息話佢哋會將婚期提前到今個月嘅27號或者29號，到時會喺W酒店舉行，由於突然提前婚期，所以就惹來未婚懷孕之說，不過朴秀珍方面嘅有關人士已經否認傳聞。而噚日韓國方面就話裴勇俊已確定會喺27號迎娶朴秀珍，到時婚禮會以非公開形式進行，主要邀請家人同埋至親好友，唔知身為裴勇俊旗下藝人兼好朋友嘅金秀賢會唔會出席呢？

由於裴勇俊結婚喺韓國係好大嘅新聞，所以韓國嘅電視台都爭相採訪有關嘅新聞，當中有電視台就對裴勇俊婚後嘅愛巢進行大起底，身為上市公司老闆嘅裴勇俊本身身家豐厚，加上旗下公司有金秀賢、韓藝瑟、朱智勛等藝人，自然財源滾滾來。

據知裴勇俊嘅愛巢位於首爾城北洞，佈置裝修都十分奢華，市價更高達90億韓元（約6,170萬港元），係韓國藝人房價中可算係頂級。