當年今日
關於我們

蘭西情報課:商場租戶要孭廣告費

蘋果日報 2005/02/15 00:00


商場競爭激烈,大業主要主動出擊搞宣傳,至可以吸引消費者,新地觀塘創紀之城五期apm,噚日出動雪糕車,喺尖沙嘴、旺角、觀塘、銅鑼灣等地免費派雪糕,果然吸引途人,出現人龍。
新地代理副總經理馮秀炎話,咁做係「要落區尋找創意」,睇吓市民反應,個場下月第三周開業,所以短期內會有好多宣傳。
商場特色租戶,有日本首度來港嘅「白木屋」食肆,五千呎。寵物連鎖店「紅蘿蔔健與美」則佔五千呎。
馮秀炎話,大業主宣傳,開支愈嚟愈大,因此佢哋研究喺租金以外,向全資持有商場內嘅租戶,收取宣傳推廣費用,先喺幾個大場試行。佢話,全資商場一直冇獨立收取宣傳推廣費(租金包埋),今次可反映商戶承租能力強。

老記考分身
今日初七,風水師話好日,宜開市,唔怪得有好多記者會、商場醒獅!
先講醒獅,共四單,九倉佔兩單,喺尖沙嘴海港城與銅鑼灣時代廣場;太古金鐘太古廣場;希慎銅鑼灣大本營都有。
咁啱,四單都係上晝十一點至中午十二點半,認真考起老記。
今日重有六單記招,大多揀中午。有家發展商可能收到風,主動取消飯局,若果唔係,老記們都幾頭痛。
另外,聽講世紀21今日有三間分行開業,但佢哋都只係選擇樂富中心一間,舉行記者會,都算識做。
羅林渭頻有斬獲
雞年伊始,唔少業主轉手賣樓賺錢。好似中型代理行利嘉閣,前創辦人羅林渭,呢排就頻頻買貨出貨,兼有斬獲。
嘉信黃富傑話,羅林渭舊年初用七百萬,買入西貢白沙灣立德台,一幢C段獨立屋,千八呎,另六百呎花園,連兩個車位,剛以九百五十萬元賣出,每呎五千三百,賺咗二百五十萬。
除咗立德台,同區銀線灣華富花園C段,二千呎獨立屋,另附花園六百呎,連埋雙車位,以一千三百五十萬賣出,每呎六千八百。

風水樓舊一舊照搶手
港人信風水,若風水師話好,單位幾乎「冇走鷄」,定可成交。
世紀21張勵山話,西貢勝景別墅,十六幢,樓齡三十四年,但放盤少,原來曾獲多位風水師盛讚係「風生水起」之地,咁業主又點肯輕易割愛呢?
最近A屋放售,好快以千一萬成交,二千二呎,另三千呎花園連雙車位。
業主半年前興之所至,用九百五十萬買入,但後嚟覺得家人移咗民,唔知幾時至返港,自己喺港島又有地方住緊,所以至肯賣。勝景𠵱家再冇放盤。
empty
YOHO盆菜促銷
近年潮流興食盆菜,聽講年三十晚,好多人都外賣番屋企一家大細齊齊食,有啲食肆盆菜賣到斷市。
元朗YOHOTown,喺年初四都搞咗個「YOHOTown品味全盆上」盆菜晚宴,反應唔錯,有成一百八十個住戶參加。
當晚搵嚟商台DJ余宜發同朱薰做司儀,余文樂、鄭融同董敏莉做嘉賓,住戶一家食盆菜之餘,又有藝人表演睇,雙料娛樂。唔知呢個活動,對樓盤嘅銷售有冇幫助呢?
電郵地址:[email protected]
empty
羅林渭賣出洋房一年賺二百五十萬。
empty
YOHOTown搞盆菜宴,請嚟藝人做主持同嘉賓,圖中為余文樂。