男人愛車亦愛女人，所以出一本以大波靚女揸Porsche為題材的漫畫，就肯定有佢嘅Market。《我愛波子》故事就正係講女主角轟麗菜，原本對車無要求，純粹當代步工具的小女人，但愛車如命的老爸，死後卻將一架PorscheCarrera留畀麗菜，她為惦念老爸而賣掉揸開嘅自動波NissanMarch、仲考埋棍波牌去揸波子，漸漸對波子產生濃厚嘅興趣同感情。記者：之達
汽車為題材的漫畫唔少，單係一本《頭D》就霸咗大半市場，要突圍一定要另闢新路，所以《我》唔講街車專講名車，能夠出現喺裏面嘅車，至少過百萬港元，Porsche、Ferrari、Lamborghini，架架都係SuperCar。
漫畫裏面的資料勁豐富，因為作者麻宮騎亞本身都係波子車主，所以內容唔會流於表面，而係仔細到你唔信，就連一粒EPU（行車電腦）壞咗、點樣壞、點樣寄番德國原廠修理、乜嘢手續、收費幾多都會話埋畀你知，對車外行的漫畫家肯定寫唔出呢啲情節，而且睇怕唔少故事都係作者的親身經歷。

適量鹽花養眼唔反感

市場導向，又點少得性感畫面吸引男讀者？主角麗菜屬豐滿型大波妹，成日被男人性騷擾，更經常無厘頭有出浴鏡頭，話係劇情需要就真係打死都無人信，不過勝在鹽花灑得適量，養眼得嚟唔會過晒火位。
之前講過《我》內容寫實，但正因為寫實得滯，搞到故事唔夠誇張，起碼主角唔識得將條車胎跣入坑渠轉急彎，亦無甚麼甚麼「公路最速理論」，結果戲劇性較弱；如果你係車癡，尤其對SuperCar情有獨鍾，咁呢本資料詳盡到同車書有得揮嘅《我愛波子》，就肯定係至愛。