社創企業唔止要賺錢，仲講求共享價值，解決社會問題，聽落好虛，其實好多人做緊。社創基金2012年獲政府獎券基金撥款5億元成立，由2015年至今收到429宗申請，資助61個項目，好似其中一個社企項目「共廚家作」，就同5間食肆合作，喺非繁忙時段騰空廚房，畀基層人士製作食物售賣，目前有16人參與共同研發逾百款新美食，參加者除咗賺到收入，仲可以提高食肆競爭力，呢個初創獲得社創基金1年資助約40萬元，運作9個月已經收支平衡啦。

社創基金主席張仁良話，基金目標係3年資助100項目，幫助3萬名弱勢社群，相信唔難達標，事實上，社創基金已經資助過唔少項目，好似「網．想，正」、製作短片簡介職業同協阻視障人士嘅「觸感－聽覺」同步系統，涉款約4,000萬元，連同上個月推出嘅「FOOD-CO」食物援助等旗艦項目，全個基金依家都係用咗近1億元，難怪張仁良咁風騷，「我唔係驚唔夠錢，係驚唔夠多好project」，佢仲話過去唔少申請者提交嘅idea未成熟，項目唔止要創新，仲要有social impact（社會影響），連結科技應用達致「雙贏」。

最近社聯搞咗個樂齡科技展有唔少好評，候任勞福局局長羅致光又話社會人口面臨高齡化，張仁良話，未來都會放眼銀髮市場，仲透露候任羅局長都好buy社創概念，遲啲仲會同科技園公司合作，搞搞樂齡科技。