當年今日
關於我們

【韓流】李孝利火遮眼 強調冇同Rain瞓過

蘋果日報 2014/08/13 06:00


韓國天后李孝利過去多年前曾經同韓國天王Rain傳出緋聞,噚日李孝利就喺主持節目《MagicEye》上面講返呢件事。

李孝利話:「記得當時嘅報道係話god其中一個成員,喺電台節目即興打比Rain,然後Rain接到電話嘅第一句就係『哥,我同李孝利瞓咗呀!』但我哋(藝人們)都知,我哋係唔會即興打電話比人,每一次都會事先同對方傾好先聯絡。即使真係即興,重點係我同Rain真係冇瞓過吖嘛。」

李孝利又話聽到嗰個消息之後,佢冇特別去出面解釋,因為當時佢工作上都有其他煩惱,但估唔到件事之後愈傳愈開,仲搞到滿城風雨。

李孝利話:「有次我去行山,咁啱行我前面嘅一對母女就傾緊呢件事。當時個女同阿媽講『聽聞Rain同李孝利瞓過。』個阿媽就話『啲藝人就係咁0架喇,有咩出奇吖。』嗰刻連我自己都唔知點解,突然火遮眼,好大聲咁喺佢哋後面大叫『我冇同佢瞓過!』佢哋擰轉頭嘅時候,就好尷尬咁講咗句『我知道喇...』」全場嘉賓同主持人聽完之後都即刻笑爆肚,仲讚李孝利好大膽添。