熱刺喺上年5月作客車路士嘅關鍵一戰，最終只能與對手賽和2:2，將15/16球季嘅英超冠軍拱手讓予奇球隊李斯特城。呢場打吡戰踢到飛沙走石，當時嘅執法球證卡頓保總共出示咗12張黃牌，當中熱刺包攬咗九張。卡頓保依家出嚟爆料，話當時其實佢可以趕走三個熱刺球員，但最尾冇咁做，因為佢想由得熱刺「自我毀滅」!

卡頓保已經唔再喺英超執法，依家去咗沙地阿拉伯搵食。對於嗰場波嘅事，卡頓保話:「我由得佢哋(熱刺)自我毀滅，因此世界上所有媒體、所有人都會寫『熱刺失冠』。但如果我趕走咗三個熱刺球員，第二日嘅頭條就會點講?就係『卡頓保搞到熱刺失冠』。呢個只係熱刺嘅自我毀滅，做就李斯特城攞英超冠軍。」

卡頓保亦覺得自己冇做錯到:「我的確幫到場比賽。我好肯定我嘅執法風格，幫到呢場波。有啲球證會執到正，到時熱刺就會得返7至8人應戰，咁佢哋就有輸波藉口。但我就唔會畀藉口佢哋，我嘅gameplan就係『由得佢哋失冠』!」

卡頓保咁講就自然會畀人鬧，但佢就話自己畀人斷章取義：「我所講嘅嘢畀人斷章取義，報出嚟嘅用字同我講嘅嘢有唔同。但對於我喺場波入面所做嘅嘢，我冇後悔到。」

----------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM