【享盡艷福】梁漢文與王敏奕埋身肉搏唔使備案 相信太太會明白
蘋果日報 2019/09/21 00:30
梁漢文假設性無罪意識大膽
（攝影：陳俊強）
梁漢文（Edmond）、張慧儀與王敏奕（Venus）合演的ViuTV新劇《假設性無罪》下月播映，這部以辦公室性騷擾為題材的劇集，講述辦公室中多段不倫戀、性騷擾、懸疑，引人入「性」。Edmond在劇中周旋於張慧儀與Venus等4位女士中；慧儀則飾演成熟能幹的女強人，思想前衞性開放；Venus有目的地加入這公司，她對Edmond十分仰慕，劇情有講述Venus被Edmond強暴。連場埋身肉搏，問到Edmond可艷福不淺？Edmond笑言對於激情肉搏戲只屬新手，要請教兩位前輩，他說：「其實套劇係講錯綜複雜嘅關係，同埋感情線，唔只係感情同埋性感場面，佢有個主體嘅，係令到大家好想追尋，除咗視覺上嘅刺激、腦筋上嘅清晰，對觀眾會係好大嘅滿足感。多多少少有啲場口會有身體接觸，雖然我入行嘅年資係比佢哋長，但係呢方面嘅經驗我真係甘拜下風，老實講我從來都冇拍過呢類戲，連嘴戲都未試過。」
提到劇集意識大膽，慧儀直言這是她首次擔演如此寫實的劇情，大感滿足，她說：「雖然我喺呢方面（性感）有豐富嘅經驗，但係唔同嘅階段心態係唔一樣嘅，好記得有一場係要演我喺屋企有性高潮嘅表現，當時好多男嘅工作人員喺度，我都覺得有啲尷尬，但係就要調整自己嘅心態，我仲會諗如果個仔睇到呢一場戲會點呢？係時候要教佢性教育。」
提到Edmond強暴Venus的戲份，Venus謂拍攝時最重要是要放手，將自己交給對手，同時要信任對方，這場激烈戲大家也很有默契，很快便能順利完成，Edmond則指這場戲在一所荒廢的學校拍攝，當時最怕是弄傷Venus，至於問到要跟另一半備案嗎？Venus說：「冇備案㗎，問咗唔得咁點算？等播出後先再同佢傾。」Edmond則直言拍攝前沒有跟太太討論，並相信太太一定明白。他們更對劇集收視滿有信心，相信觀眾也會追看，並期望原班人馬開拍續集。
採訪：羅慧敏
攝影：陳俊強
攝錄：廖達燊
化妝：Hetty Kwong（梁漢文）、King Yip @ KingsMakeup（王敏奕）
髮型：Moe @ IL COLPO （梁漢文）、Hanson Leung@Beijing Hair Culture CWB（張慧儀）、Ken Hui @ ii Alchemy（王敏奕）
場地提供：九龍貝爾特酒店
梁漢文、張慧儀與王敏奕，合作拍攝以辦公室性騷擾為題材的劇集。
張慧儀指劇中有一場現性高潮的戲份，因拍攝現場有很多男工作人員，故埋位時頗為尷尬。
Edmond笑言自己對激情肉搏戲，只屬新手。
王敏奕指拍攝被梁漢文強暴的戲份時，最重要是要放手及信任對手。
張慧儀在新劇中飾演女強人。
梁漢文笑言拍肉搏戲前沒有跟太太討論。
梁漢文在劇中強暴王敏奕的劇份，他指拍時最怕是弄傷對方。（影片截圖）