【維園燭光●年輕一代】拒絕遺忘不讓史實湮沒 「中共殺人就係唔啱」
維園燭光六四29
六四29周年,90後及00後從未經歷六四事件,有年輕人選擇與六四切割,亦有年輕人認為六四與香港無法分割,即使政治光譜各有不同,亦希望歷史一代一代傳承下去。
就讀城大專上學院公共行政一年級的唐同學指,「香港學生可能真係冇責任幫中國爭取民主,但係大家都要記住呢段歷史,個政權有幾醜惡」。他指中學時曾讀過六四歷史,「有個好細嘅框講六四,以前覺得六四事件可悲,而家係覺得憤怒」。對於有大專學生會與六四切割,他指自己亦是本土派,但認為無論有何立場,也應毋忘這段歷史,「原因係唔好忘記真係發生過嘅中國歷史,中史書字眼而家有修改,我讀緊書時可能仲有教六四,下一代學生可能唔知咩事」。他提到日前看到眾志訪問,有學生回答坦克車相是戰爭片,令他感到驚訝,更加認為六四「要提,不斷提醒,每年都要提一次,咩立場都係,老中青三代都唔好忘記呢段可怕而且令人憤怒嘅歷史」。
同校的梁同學則指,六四是中國步向獨裁的轉變,亦認為香港是中國一部份,「依家香港人唔承認自己係中國人,係因為中國嘅政權步向古代極權,想同中國隔離,自己沉醉香港係好民主,但其實中國有啲改變,係改變到香港」。他稱,六四運動由中國學生發起,「唔關香港學生事,但係關連到香港學生嘅民主運動」,自DQ及政治犯入獄後,他指校內同學亦慎言,「好似唔關自己事,但原本就係市民去影響政權嘅發展,香港人而家覺得好少嘅一步都影響唔到個政權」,認為需宣揚更多六四知識。
讀中五的卓同學是首次參加六四悼念活動,受訪但不希望上鏡,「係擔心比網絡五毛公審,唔想影響家人同朋友」。他認為港人要毋忘六四,因大陸一直打壓,教局亦更改字眼,「相信六四都會係歷史入面,慢慢比共產黨滅咗或美化咗」。他指,同學都不熟悉六四,「佢哋話咩嚟架,冇聽過喎」,自己則是最近是從朋輩得知,故特地來感受氣氛,「我作為學生,都要清楚件事,唔可以比佢慢慢消失,好驚香港未來都有六四件事」。
讀中二的唐同學今日與爸爸到維園參加集會,他自小二起每年參加六四晚會。唐父指,希望兒子自小認識中共罪行,形容六四屠城是犯下反人類罪,同納粹希特拉無分別。他笑言,兒子小時參加六四晚會,會捐出所有新年利是錢,自己仍記得兒子當時豪言壯語,「有一億捐一億。」唐同學說中共在六四做壞事「亂咁殺人」,未來會繼續出席六四晚會,認為悼念六四與年紀大小無關係,「中共殺人就係唔啱,無話關唔關邊啲(年齡)人嘅事。」
今年27歲、從事廣告界的阿巧,與從事平面設計、年紀小一歲的妹妹阿凱出席六四集會,二人年年參加,至今近10年。阿巧說,六四需要平反,亦支持結束一黨專政,因而參加今晚集會,予以支持。阿凱同樣認為需要悼念六四死難者,且因曾參與佔中運動,「明白學生嘅情緒」。她們都認為,六四集會形式均無需改變,阿凱說「心意先係最重要」。她認為要吸引年輕人參與,應從教育入手,「而家睇新聞,好多小朋友都唔知六四係啲咩,根本佢哋對中國嘅歷史都好迷惑」。
22歲任職社工的崔先生,直指年輕人不欲參與六四集會只因無力感,「年青一代都好無力,又唔想承認中國係一個合法政權」。要繼續傳承歷史,讓年青人繼續談及六四,他認為除六四集會外,亦可舉辦不同社區活動。崔指明白不少人未必同意支聯會的理念,除政治路線分歧,亦因支聯會未有採納聽取其他聲音,讓不同意見人士在集會大台發言,若支聯會對年輕人有多一分尊重,可吸納更多年輕人參與集會。
生於1993年的設計師Britney,小時候已在家人口中得知六四事件,自小已隨家人到維園參加集會。她表示,人越大對六四事件越有感受,言談間不禁落淚:「我覺得...點解而家啲人覺得呢件事唔關自己事?你可以覺得呢件唔係香港嘅事,但嗰班係...曾經為呢個地方發表過己見、亦犧牲咗嘅人,我哋唔應該咁冷漠,同埋(唔應該)覺得呢件事唔使再被提起。」她指年輕人如何運用自己的力量、技能為社會做一些事,「呢個都係我搵緊嘅答案。總有一日我爸爸媽媽、佢哋成班朋友嚟唔到集會嘅時候,係咪呢件事就要喺我哋呢一代消失呢?好想見到佢哋努力咁多年之後,係會成功(平反六四)、得到回報。」
大專唐同學認為無論有何立場,也應毋忘這段歷史,「每年都要提一次,咩立場都係,老中青三代都唔好忘記呢段可怕而且令人憤怒嘅歷史」。何頴賢攝
大專梁同學指六四運動由中國學生發起,「唔關香港學生事,但係關連到香港學生嘅民主運動」。何頴賢攝
首次參加六四悼念活動的卓同學,指同學都不熟悉六四,自己也是最近是從朋輩得知。何頴賢攝
唐同學(右)與父親冒雨到維園參加集會,認為悼念六四與年紀大小無關係,「中共殺人就係唔啱,無話關唔關邊啲(年齡)人嘅事。」潘柏林攝
阿巧(左)與阿凱姊妹二人,參加六四集會已近10年,認為六四要平反,亦支持結束一黨專政。何逸蓓攝
Britney說,人越大對六四事件越有感受,言談間不禁落淚,「點解而家啲人覺得呢件事唔關自己事?」黃文邦攝