當年今日
關於我們

隔牆有耳:
長毛唔同鼠王芬對嘴 - 李八方

蘋果日報 2015/02/10 00:00


有艷福都唔享?社民連主席長毛梁國雄認真嘥料!噚日立法會資訊科技及廣播事務委員會討論亞視續牌,經民聯梁美芬席間力撐亞視有創意,長毛唔認同,梗係反駁一番,最終佢拋低一句:「我唔想喺度同你對嘴。」嘩,呢句話咁惹遐想,難怪引嚟議員兼在席嘅商務及經濟發展局局長蘇錦樑笑晒。
梁美芬發言時話喎,自己係亞視〈感動香港〉節目評判、又係亞視觀眾,認為係股東「唔爭氣」。
長毛反駁梁美芬口中大讚有創意嘅亞視,只係「不停播舊嘅創作」,只係將節目時間重新編排進行「再創作」,反以魔童王維基寸爆對方指:「王維基夠創作晒啲嘢放喺度啦,你又唔讚吓王維基嗰啲創作人員?」