電影《無雙》噚日喺香港理工大學舉行特別推介場，導演莊文強聯同周潤發、廖啟智出席放映後的座談會，三人甫現身同學們即拍掌歡呼，氣氛高漲。

智叔呼籲同學們不要劇透，發哥即搞笑問：「咩叫劇透呀？」智叔解釋劇透意指「唔好穿橋」，發哥即搞笑地話：「咁你哋唔好劇透呀！」

發哥話做演員好幸福：「死好多次都可以唔使死，呢套戲係上年拍嘅，加埋剪接、音樂，將導演嘅訊息轉化為真，又可以令到大家感動，其實好多嘢都係戲假情真。戲入面我瞪大對眼就要殺死你，其實我個人好和藹，都係搵食啫。」發哥又表示為戲中的槍戰部分，練習咗幾個月：「我好尊敬槍，因為佢做出嚟係用嚟殺人，每次都要檢查得好仔細，一陣沙塵滾滾殺錯良民。」

發哥又鼓勵同學，做事要堅持到底：「條路係難行，但係冇得回頭o架，因為回頭就要重新開始。對於得失，我好感恩，因為我得嘅嘢總比失嘅多。」

大會安排同學發問，有同學問點樣可以好似發哥咁有型、又識賺錢，成為人生主角？發哥笑住叫同學聽日去大台叩門：「你要搵快錢，第一時間梗係做看更，瞓覺之嘛，皮幾嘢o架，唔好洗碗，洗碗辛苦呀。你搵到錢就有理想，有理想就有舞台，有舞台就可以做主角o架啦。」

至於電影中有大量偽鈔場面，早前有電影道具師因道具偽鈔被控罪，莊文強就話已跟手續同規矩做，又笑指如跟足電影中方法造偽鈔，每張成本比面額更高。三人完成座談會後，當然與全場同學大合照，發哥更親自揸機selfie，而發嫂亦有參與大合照。

精選娛聞，喺晒《娛果》
http://fb.com/appledailyent