韓國性感女團Nine Muses於2010年以9人之姿出道，不過韓國樂壇競爭好大，Nine Muses一直都未能發圍上位。隨住6月成員E U Erine同敏荷合約到期而退團，今日有消息傳出Nine Muses再走一個，29歲成員懸雅表示同公司約滿唔再續約，並退出組合。

據了解懸雅同原東家StarEmpire事務所合約於上月30號到期，及後懸雅亦親自喺粉絲論壇留言感謝粉絲：「我考慮咗好耐先做出最後決定，會懷念粉絲嘅愛及成員間嘅歡笑、嘮叨，雖然對未來仍然有擔心、有迷茫，但作為隊中嘅大姐，希望自己唔會失去當初嘅熱情。」令粉絲相當不捨。

而StarEmpire事務所事後亦發聲明表示：「過去6年以Nine Muses成員活動嘅懸雅，同公司嘅合約於上月30號約滿。經過多次嘅討論，公司尊重懸雅嘅決定所以冇續約，今後Nine Muses將以成雅、倞利、慧美、笑珍及金祚5人組合活動。」