劇集《延禧攻略》入面，監製于正喜用新晉演員，好似吳謹言就係成功例子，劇中有唔少小鮮肉好似演傅恒嘅許凱，同埋演海蘭察嘅王冠逸。來自新加坡嘅王冠逸，兩年前毅然移居北京闖一闖，而穿針引線嘅係演皇后嘅秦嵐。

今年30歲嘅王冠逸，日前接受周刊訪問，佢透露細個唔鍾意讀書，16歲剪頭髮時被星探發掘做Model，又去過日本受訓組男團，可惜事與願違。當時做新人嘅佢，試過因經理人搞錯通告，搞到佢要喺電視台高層面前下跪，仲要剃頭謝罪，真係慘慘豬。後來佢同爸爸講想重拾書包讀書，就考入咗皇家墨爾本大學，畢業後返新加坡發展做藝人。

曾經拍過施南生監製《無限春光27》嘅佢，露股上陣、同日本AV女星拍床戲，後來佢覺得發展一般，毅然移居北京博一博，當時獲秦嵐穿針引線，仲經常帶佢上節目同拍劇，因而傳出二人「姊弟戀」，不過秦嵐強調視對方係弟弟，唔想影響佢識女仔，今次兩人一齊拍《延禧》，王冠逸終憑海蘭察一角，大受歡迎。

精選娛聞，喺晒《娛果》
http://fb.com/appledailyent