最近與陳山聰打得火熱的何超雲，前晚撇甩男友與化妝師出席LAMER活動，同場還有葉佩雯、EricKowk及楊崢等。超雲與化妝師拍照期間，化妝師識做彈開讓超雲獨照，她即尷尬叫對方一齊影，問她是否不習慣單拖現身？超雲謂：「唔係，我自己陪化妝師嚟，呢個牌子都係佢介紹畀我用。（陳山聰唔到？）唔知喎，你問番佢啦！」

記者笑指超雲、山聰以往常孖公仔出現，為何突然「生疏」，超雲說：「食飯還食飯，我今日嚟呢個活動，遲啲自己都會搞生意，不過詳情唔透露得住。」她直言有意做女強人，繼早前的時裝生意後，將發展另一門生意，現時積極跟媽媽學做生意，準備在商界大展拳腳。
雖然陳山聰未有陪超雲現身，但兩人繼續在微博晒恩愛，昨日凌晨近四時，陳山聰上載一張士多啤梨批的照片，寫着：「相識至今，妳用了很多心機做了很多美味的蛋糕給我吃、使我覺得很幸福！但今天這一個是最窩心、最感動的！」半小時後，超雲即冧爆以「親親」公仔回應。
採訪：王連連
攝影：陳慧安