陳奕迅（Eason）噚日喺屯門市廣場，為演唱會DVD搞簽名會，台上仲有四個變身迷你Eason嘅小朋友，扮佢演唱會嘅造型出場。Eason下星期36歲生日，大會送上生日蛋糕，現場逾千個fans同佢一齊唱生日歌。
問Eason準備點樣慶祝生日？佢話：「生日會請三日假，未諗點慶祝，哈林28號生日，佢24號喺台灣開騷，我都想join，不過唔帶屋企人。我生日前會返嚟，生日就安安靜靜咁，一家人食飯囉！」
問囡囡舊年送咗乜嘢生日禮物？Eason自認冇心肝，已經唔記得囡囡送咗乜，佢話：「其實放假忙過做嘢，喺屋企要整啲水喉漏水、換燈膽呀，做番正常人。」

個唱DVD加工補甩漏

Eason話之前掛住睇世界盃，肥咗唔少，仲話自己要好似黃貫中咁，要到40幾歲先有鋼條身形喎。Eason之前開演唱會出現聲沙情況，佢承認喺DVD中，部份歌曲要做啲後期製作，佢話：「唱《一絲不掛》時，因為忍唔住笑，又甩咗啲詞，所以要補番上去。」