「8」字頭股票當中，第一電訊（8110）預期PE同P/B，都係平通街，勁抵買。一電主打流動電話買賣及分銷，單係06年度（12月底止），集團營業額上80億銀。要咁睇，一電營收唔嘢少，毛利率只係講緊1%輕微增長，一電嘅邊際利潤就可以額外增加近1億銀，爆炸力好驚人。香港消費市道暢旺，加埋隨身聽嘅手機熱爆，換機潮浪接浪，一電作為分銷界一哥，熱潮食到正一正，估計毛利率大有機會上調。
一電07年首季，純利已經升咗3倍到1554萬銀。好保守計，一電全年度純利只係增長1倍到8140萬銀，PE落番7倍單位數。又一電最新NAV0.45元，現價（0.3元）折讓33%，P/B都係0.6倍。家陣創業板指數預期PE貼近50倍，P/B上到4倍，唔怕貨比貨，一電平得多，就算現價翻一番到0.6元，PE只得14倍，P/B都係講緊1.3倍。

泛海大把向上空間

泛海（129）啱啱公布07年度（3月底止）醒神業績，純利勁升70%到2.88億銀。當中，物業銷售溢利更加翻一番到1.3億銀，業績再唔係單靠物業重估盈餘，實淨到爆。相信住宅發展踏入收成期，會繼續支持泛海08年度增長，PE繼續keep喺5、6倍水位。又泛海連重秤後NAV0.85元，現價（0.32元）折讓62%，又係吸引到痹。泛海現價翻半番到0.45元　，預期PE都係8倍水位，NAV折讓47%。
錢雋