當年今日
關於我們

【告一段落】修哥出手擺「和頭酒」 謝賢曾江一張合照粉碎不和

蘋果日報 2018/12/12 11:05

謝賢曾江胡楓

之前一度被指神隱多年嘅吳啟明,喺今年5月被《蘋果》發現佢開食肆做老闆(新聞連結: http://bit.ly/2CN0IvA ),呢間餐廳噚日喺中環正式開幕,吳啟明仲成功邀請咗當年劇集《大時代》老竇鄭少秋同其他「三蟹」到場剪綵,胡楓(修哥)、謝賢(四哥)及莊思敏亦一齊到來祝賀。
修哥表示早前同四哥相約食飯,佢提議約埋曾江(Ken哥)一齊食,四哥當然叫好,飯局中3位小生更合照留念,氣氛融洽,四哥同Ken哥嘅不和事件粉碎,雖然當年喺《四個小生去旅行》記者會上曾江被謝賢掌摑,但其實之後曾江同四哥都不約而同喺出席活動時解釋呢一掌係被安排,曾江曾經話:「全部都係被安排嘅情節,大家係演員,都知被掌摑但就唔知幾時出手。」,而四哥亦曾對不和傳聞表示:「黐線嘅!我哋依家唔知幾friend,嗰時係做戲!嗰巴係四個人一齊度,係擺我上枱,我個人有乜所謂箒,不知幾過癮!」
不過無論過程係點,呢一場「四個小生打大交」嘅戲碼都有個好結局,至於呢餐「和頭酒」邊個埋單?修哥話:「原本我想請,但係老四同我講話佢請,咁我點會同佢爭?佢住過億豪宅,我只係住幾百萬嘅樓,咁梗係佢請我啦!」四哥即時掩住修哥嘅嘴叫佢「講順啲」,修哥笑稱自己漏口係眾所周知。
另外,當記者追問四哥有關佢個前新抱張栢芝被傳生咗第三胎(新聞連結: https://bit.ly/2rxkGni ),四哥即落閘話唔好問佢。
精選娛聞,喺晒《娛果》
http://fb.com/appledailyent
empty
胡楓(修哥)、謝賢(四哥)及一齊到吳啟明新店祝賀。
empty
當年喺《四個小生去旅行》記者會上曾江被謝賢掌摑(資料圖片)
empty
修哥表示早前同四哥相約食飯,佢提議約埋曾江(Ken哥)一齊食。
empty
修哥笑稱自己漏口係眾所周知。
empty
飯局中3位小生更合照留念,氣氛融洽。