人妻譚小環呢排同「大佬孝」邵仲衡一齊拍台劇，佢哋戲假情真，鏡頭後friend到爆，噚晚仲約埋食喺銅鑼灣開餐，各自撇低老公同老婆，兩人約會期間，被發現共飲一杯雞尾酒。小環任職保險高層老公蔡強榮（Eric）今年6月被雜誌影到約異性圓方嘆茶，其間態度瞹眛，不過事後小環力撐老公，小三風波告一段落。

小環噚晚約會大佬孝斷正，唔通係向老公示威，一於你做初一，我做十五，《蘋果》打畀小環，佢接電話即笑唔停：「得啖笑，老公慣咗我咁，唔使交代，噚晚老公同佢團隊銅鑼灣開會，我同大佬孝都喺銅鑼灣食飯，老公仲撞到我哋。銅鑼灣咁多狗仔，如果我要約會都唔去嗰度，預咗中硬，我約新一代男神，有晒心理準備俾人影到，見我哋冇鬼鬼祟祟就知冇嘢。」

但點解要一杯雞尾酒兩份共飲？小環抵死話：「我覺得冇問題，人一世物一世，乜都要試吓，我講嘅係未飲過呢款cocktail，大佬孝叫咗咪畀我試一啖，下次同人講開都話試過嘛。」原來人妻係單純到想話畀人知佢識嘢啫，收到，完全明白晒。小環話唔介意同異性單獨約會，佢話：「自己開心咪得，問心無愧。」小環再被踢爆騎莫少聰外甥Jordan單車尾。

長得童顏臉嘅小環自爆全靠「蜜」會帥哥保青春，開心自然心境年青，呢個係佢「回春」秘密：「所以我都御准老公去約後生女㗎，英女皇御准呀，下次大家影到我老公都唔使大驚小怪，歡迎嚟問我回應。」Eric都對《蘋果》話：「我身受其害，全明白成件事冇嘢。我知小環同大佬孝食飯，我仲『撞破』佢哋，影埋相。」

佢主動WhatsApp畀記者，原來係Eric同大佬孝集郵相，佢話雖然同老婆分開食，之後仲接柯打去車返小環返屋企。Eric話唔介意小環同大佬孝共飲一杯雞尾酒：「小環唔飲得，佢試吓味啫。小環做呢行，畀人影相唔奇，但重點我唔係呢行好影我。」Eric表示對小環信任一百零一分，唔會懷疑佢偷食。