林宥嘉（Yoga）嘅世界巡迴演唱會香港站，噚晚喺紅館完成頭場演出，婚後嘅Yoga首度來港開騷，有觀眾趁歌與歌嘅空檔大聲叫Yoga快啲生小朋友，佢聽到後就講笑話：「我會，但演唱會這兩天比較累，演唱會後再生，可以嗎？」

唱到快歌環節時，有舞蹈員扮成唔同嘅怪獸亮相，同Yoga一齊做瑜伽動作，其後佢話：「我出道已經10年，很多當年是小妹妹歌迷現在應該已生了小妹妹，以防她們坐不定，所以我就弄了一個兒童頻道，我真貼心。」佢又話大家都知佢份人文質彬彬，但呢兩年有啲改變，台下有啲歌迷即刻大叫好老公，但佢話其實係變得喺台上好放縱。

Yoga唱完一輪快歌後就話：「香港開演唱會很爽！好羨慕五月天每年都來，難怪要開10場，真的很開心，你們真的很棒！」然後又用廣東話唱出由黃偉文(Wyman)填詞嘅作品《壞與更壞》。

Encore部份，Yoga再度話嚟香港演出好開心，希望下次唔使再隔兩年先有機會開演唱會，有歌迷台下舉住「金曲加油」嘅牌，希望Yoga喺即將舉行嘅台灣金曲獎有好成績，佢就話：「很可惜，我猜評審今天應該沒來。」

到唱最後一首歌時，Yoga就話向來視陳奕迅為偶像，早喺多年前參加歌唱比賽時，已經有歌迷用Eason喺紅館演出嘅相去鼓勵佢，希望佢似Eason為目標，講到呢度Yoga就忍唔住喊，仲擰轉面抹眼淚，最後再以《說謊》作演唱會最後一曲。