周星馳套《西遊伏妖篇》今年失落賀歲票房冠軍，喺內地都畀成龍套《功夫瑜伽》好似追數咁追個累積票房，睇嚟都喺冠軍地位不保。其實計返星爺今趟已經喺第4次用《西遊》做題材，好多年前星爺主演嘅《西遊記之月光寶盒》同《西遊記大結局仙履奇緣》，今日已經成為經典。

近日有大陸傳媒報道，擁有《西遊記大結局仙履奇緣》呢套戲版權嘅大陸西影集團，搵到大量未曝光嘅片段，總共有成10個鐘。西影集團決定將呢啲片段修復成2K高清，之後會推出加長版本，新版畀舊版長差不多12分鐘，仲保證唔會破壞原本嘅劇情喎。暫時會定喺4至5月上映，宣傳海報都有埋。

據大陸傳媒問過星爺同導演，原來都冇被知會將會重映，而星爺嘅大陸宣傳人員，都話：「這個電影星爺雖然是主演，但（重映）作為片方的決定，我們不太清楚，和我們無關。」

有份喺《西遊記之月光寶盒》飾演鐵扇公主嘅蔡少芬今日透過助手回覆話：「都唔知道呢單新聞，冇嘢好回覆。」

有大陸網民覺得電影公司借今年有星爺嘅新片上，乘機搵錢，亦都有網民希望加版係用國語配音，驚聽唔明懂廣東話，錯過咗笑點。

留意番，呢個大陸西影集團，2014年10月24日至11月2日期間舉辦《大話西遊》懷舊放映，帳面賺2,600萬人仔。但西影總經理就指，放映活動係為《大話西遊》3D重製做research，周星馳毫不知情。