林超賢、任達華、楊受成同于冬等今日喺灣仔為電影《紅海行動》舉行慶功宴，電影於中港兩地邁向45億港元票房，亦破咗全港最賣座香港導演周星馳《美人魚》嘅紀錄。至於會唔會定下目標衝上50億，楊受成坦言比較難，期望能夠貼近此數。問到係咪賺大錢？佢話：「如果相比起地產同金融，咁就差好遠，不過都開心，部戲叫好叫座。」佢又話喺自傳中已指出林超賢係一位超班導演。

講到會唔會加林超賢片酬，楊受成話：「佢肯就好，我私人都畀大利是佢，又有分紅，于冬唔肯畀就我畀，其實分紅都夠佢買層樓。」楊受成又透露已向林超賢推介自己最新樓盤中價值7,000萬獨立屋，並表明如果對方合心水就先入住再慢慢計數。

獲老闆推薦買獨立屋，林超賢坦言聽到都驚，不過仍欠公司3部電影，稍後將會開拍一部講述中國交通運輸部電影，佢話：「暫名叫《緊急救援》，係幫內地政府部門拍，同央視合作，講海上救援工作。」佢指製作費與《紅》片相若，大概5億，林超賢表示若果製作費再加碼會感到好大壓力。於《紅》片中飾客串嘅任達華笑指如果唔做演員，應該會投考警隊，佢建議香港年輕人每年可以抽3至4星期，嘗試體驗軍人生活，學習紀律。

精選娛聞，喺晒《娛果》
http://fb.com/appledailyent