明禎背後收收埋埋好多秘密,你敢問,佢敢答,明禎樂於同粉絲開心share,佢用普通話夾雜半鹹淡廣東話講:「私底下我……不洗臉。」其實有女藝人都講過拍完嘢返屋企,太攰唔記得落妝就去瞓,不過,明禎個case唔同:「不是夜晚,是起床啊!」明禎講完臉即紅起來,佢唔好意思話:「今早起身,我因為要坐早機由台灣來港,沒時間化妝,我6點要出門口,我就瞓到6點,拎個包包就出去。如果我洗臉,好花時間,我覺得皮膚啲油好滋潤,所以唔使洗。」明禎得天獨厚,皮膚靚到如剝雞蛋殼,又白又滑。
明禎本月29日現身九展舉行「#Me& U派對」演唱會,佢賣關子話到時會有秘密武器,「這場特別為香港朋友舉辦,我會有新動作,也正努力練唱新歌,準備到時唱畀大家聽。」咁會唔會給粉絲送「抱抱」?明禎大講爛gag:「我送pillow。」明禎話工作忙,經常睡眠不足,所以佢最想收聖誕禮物,竟然係有時間瞓多啲,咁就心滿意足。