勇士喺2015同2017年贏得NBA總冠軍後，都喺奧克蘭舉辦冠軍巡遊，同一班粉絲齊齊慶祝，而班主拉格比（Joe Lacob）亦承諾會支付所有費用。不過，美國傳媒近日就爆料，話原來勇士仲未找數，拖欠奧克蘭市政府逾百萬美元！

據美國傳媒報導，勇士隊今年六月舉行嘅奪冠巡遊用咗大約81.6萬美元，而奪冠巡遊已經過咗三個月，但勇士仲未畀錢。事實上，勇士喺2015年奪冠巡遊所用嘅24.4萬美元，都仲未向奧克蘭找數！

有消息指奧克蘭市政府已經催促勇士找數，仲寄咗張100萬美元嘅帳單畀勇士；雖然上面截止日係今年8月19日，但是勇士都仲未畀錢。奧克蘭市發言人Karen Boyd指出：「我哋同勇士溝通緊，佢哋對於某啲支出有疑問，而我哋已經作出解答。」而勇士發言人Raymond Ridder就話最終嘅支付金額尚未落實。