張彥博噚晚喺九展綵排本月9日舉行嘅演唱會，劉佩玥擔任特別嘉賓，噚晚佢同張彥博主要係傾同時會合唱咩歌。而張彥博受訪就話心情既緊張又興奮：「綵排時搵番以前夾band嘅感覺，好開心，好享受舞台。」

佢話到時會播出自己入行嘅心路歷程：「今次舉行演唱會，時間好趕，好彩得到好多朋友幫手。表演嘉賓方面，除咗劉佩玥之外，仲有馬德鐘、《跳躍生命線》班兄弟、關心妍、陳奐仁等，仲要特別多謝張致恆(Steven)幫手做籌備，提供好多意見。」

而同劉佩玥就有特別表演環節，佢話唔係跳辣身舞，張彥博笑話：「佢肯跳我冇所謂，但我好似一碌木咁。」劉佩玥就話：「我知道張彥博咁多年嚟都有玩音樂，今次有自己音樂會，作為好朋友，一定支持。人生有幾多呢啲機會?我覺得唔好錯失，好戥佢開心。」

精選娛聞，喺晒《娛果》
http://fb.com/appledailyent