黃一山（細龜）、何紫綸、曾頌珊及莊端兒今日喺灣仔出席網絡電影《我要做業主》發佈會，身兼演員同製片嘅黃一山喺電影入面，同何紫綸飾演夫婦，而曾頌珊就演囡囡，佢哋話電影將會喺十月開拍，並遠赴馬來西亞拍攝。何紫綸話：「我細細個就睇山哥嘅戲，知道要同佢合作演夫婦，近來都番睇佢嘅電影，好似《逃學威龍》咁。」

既然會飾演夫婦，咁戲中有冇親熱鏡頭？細龜講笑話：「原本就冇嘅，但睇嚟要改一改劇本，始終套戲係講做業主，咁屋入面一定有床，所以床戲應該唔少得。」

另外，莊端兒就話今日特地嚟支持好友何紫綸，講到電影以買樓為主題，佢話全靠有媽媽督促，所以早在03年已成為業主：「當時600幾呎新樓首期係8萬，仲送車位同2萬幾蚊入伙利是，後來賣出賺咗一倍以上。」

莊端兒透露現時繼續有物業放租，同時目標係未來喺香港開咖啡店：「香港啲鋪租太貴，o依家說服緊媽咪投資，自己亦考緊咖啡師課程，希望明年可以成事。」感情方面，佢話雖然有追求者，但未遇到合適對方，仲話對方有無樓係其次，合眼緣同專一先最重要。

精選娛聞，喺晒《娛果》
http://fb.com/appledailyent