新特蘭同愛華頓星期三會喺英格蘭聯賽盃對壘，為咗推廣紀念因為不敵癌魔逝嘅新特蘭小球迷巴特利（Bradley Lowery）而成立嘅慈善基金，兩隊將會放棄平時嘅波衫衫袖贊助，改為著有巴特利基金logo嘅波衫出賽，比賽之後波衫仲會由球員簽埋名，然後拍賣為基金籌款，非常有意義。

6歲嘅巴特利係黑貓球迷，佢因為罕見癌症神經母細胞瘤喺今年7月離世，佢喺舊年9月1號黑貓主場對拖肥嘅英超聯賽做球童，之後兩隊就成為咗小巴特利家庭嘅最大支持者，今個月較早時候，葛迪遜公園仲為佢搞咗場慈善賽，而Bradley Lowery基金今個月亦獲得註冊為慈善機構，目的係幫助有小朋友患病嘅家庭。巴特利嘅媽媽Gemma話「好開心見到波衫上面有基金嘅logo，呢場比賽對我哋別具意義，新特蘭同愛華頓嘅支持令到我哋非常感激。」