日本女歌手宇多田光嘅攝影師兼導演前夫紀里谷和明，噚日喺twitter宣傳佢嘅全新網上雜誌，佢邀請咗女星佐佐木希拍攝一輯陰氣沉沉嘅寫真，要佐佐木扮性感陰沉嘅吸血鬼。

一向演技麻麻嘅佐佐木希，近年努力磨練演技，又大改形象，佢喺紀里谷和明操刀嘅寫真入面著上性感黑色服裝，化身美艷吸血鬼，一時又攞住血淋淋嘅道具心臟扮吸血，令人毛骨慄然。