【新增訪問】

沙田馬場今午（18日）跑罷前四場，兩大地頭蟲莫雷拉及潘頓都無入過三甲，各於騎師王零分包尾。

卒之跑到第五場四班草地1200米，兩大好手終於有睇頭，潘頓騎文家良馬房大熱「艮志騰雲」成功連捷，單Win及組合獨贏A1分別派32及21元。而莫雷拉策蘇偉賢馬房「喜躍時刻」跑第二，兩大猛將包辦11倍連贏，分別在騎師王取得12及6分。

3歲澳洲自購新馬「艮志騰雲」上仗12檔出閘，最終由頭帶到尾贏四班田草1200米開齋，今次仍是同班同程，從7檔起步，掛頭牌只負130磅，多上賽四磅，騎師仍是潘頓，結果再度一放到底，大勝2.75馬位，擺明質素大超級。

文家良說；「『艮志騰雲』有進步，今場檔位比近兩場好，形勢有利，加上主要對手『喜躍時刻』目前仍未成熟，故『艮志騰雲』順利取勝。」

「艮志騰雲」至今3戰得2冠1殿，前途一片光明，此駒同時是文家良季內首匹連捷馬，潘頓今場棄騎「七十七十」(結果跑第八)而揀「艮志騰雲」，果然冇揀錯；潘頓連續第九個賽日贏馬，保持爭冠軍機會。

第五場二至四名順序為「喜躍時刻」、「保羅威威」及「老實人」，四重彩派5,099元。