之不過讀者要左丁山表態(一位測量T來函),就唔表唔得,讀者乃《蘋果》之衣食父母,肥老黎嘅老闆,佢哋有合理要求,盡可能範圍之內(唔識答就冇得好講)都要解答吓。答之前,要做番啲功課,於是搵一個二十歲大學生問吓,大學生話:「唓,你哋好似不食人間煙火咁清高,使乜咁緊張呀。舊年我啲中學同學入港大、科大、理大,咪一樣俾人玩到殘;今年佢哋玩番啲新生夠本,係咁簡單啫。中大生你估會特別道德啲咩!」佢將一啲中文大學學生嘅聲明畀左丁山睇,跟住就去咗打機。
睇咗一輪,先知道「新亞桑拿」海報唔係新亞學生創造嘅,而係逸夫迎新營製造出嚟去「悶」或者「砌」新亞學生,經傳媒報道,好多人(包括左丁山在內),就誤會咗「新亞桑拿」係新亞學生嘅傑作。經新亞方面強烈抗議後,逸夫迎新營籌委會喺九月三日發表聲明,向新亞書院及受影響嘅新亞同學致歉,聽日再講。