「香港小姐」、「亞洲小姐」、「工展小姐」，呢啲名聽落都覺得正正常常，但係日前無啦啦，有個名為「2016大閘蟹小姐競選」嘅活動喺facebook出現。嗱，唔係惡搞㗎，呢個選舉係由一個飲食集團舉辦，仲有6位佳麗參。齋聽個名都覺得奇怪啦，到底「大閘蟹小姐」係用咩準則去選㗎呢？填詞人梁栢堅喺facebook share都忍唔住問：「鬥多毛定鬥多膏？」

今次有6位佳麗角逐呢個「大閘蟹小姐」嘅頭銜，當中Yoki Tong(唐碧霞)就係今屆落選港姐，佢仲要喺未選之前就捲入「20萬富豪飯局」事件，當時佢回應話：「我受過教育，又是大學生，沒有理由做這些事！」(相關新聞： http://bit.ly/2cCBRe3 )不過就有人爆料話，Yoki住公屋，性格非常「港女」，中學時候發明星夢做過私影model，夢想嫁個有錢人。唔知真定假啦，總之一直係風頭躉嘅Yoki，突然宣佈退選，更向傳媒稱碩士畢業後可能會再選港姐。

點知話口未完，喺日前fb post呢個「大閘蟹小姐」選舉時，赫然見到Yoki在參選之列，排no.4。呢個活動一出，好多人都喺facebook share，有網民話：「我最唔理解係，咁嘅頭銜竟然都有咁多高質囡囡參加」，有網民抵死咁話：「好似大閘蟹咁綁實哂喺台上一字排開俾裁判評分」，又有網民問：「到底條橋係邊個諗出嚟？」

呢個「大閘蟹小姐」選舉仲有全民facebook投票，不過4號嘅Yoki人氣就麻麻地，網民多數都係支持2號鄧以婷同埋6號張珺。

估中咗當選佳麗嘅網民，有機會獲得「75分鐘任食大閘蟹放題」做獎品。不過講返轉頭，得嗰一個鐘零三個字可以食到幾多隻大閘蟹呢？食太多小心出事呀！

Yoki今日回覆《蘋果》，佢話：「本身諗住幫朋友手，詳情唔係幾清楚，不過幾搞笑吖，可以振興香港經濟。」Yoki話唔選港姐都好忙，佢最近接咗兩部新戲，佢話：「下個月會出埠拍，o依家忙緊鑽研劇本。」