韓國演藝圈連環爆出多宗韓星父母欠債嘅新聞，令多位韓星都因而成為新聞人物。
 
繼Rain、Tiffany、車藝蓮等人被爆父親或母親涉詐騙後，噚日又連環爆出多位韓星家人或本人捲入詐騙事件，當中韓劇《完美的妻子》嘅37歲女星趙茹珍，其父被指曾於2004年時以建設療養院為理由向A某借咗2億5千萬韓圜（約175萬港元），但之後卻一直冇還錢，A某話：「因為女兒係藝人，所以冇諗過趙茹珍嘅父親唔還錢。」

事後趙茹珍方面對於父親嘅爭議就表示道歉，又指：「首先不管理由如何，我都會向因父親嘅事情而受到傷害嘅人表示歉意。」同時趙茹珍方面指佢本人同父親冇任何交流或聯繫，相關嘅內容完全無法掌握，但強調會留意事態發展，努力解決問題。

而韓劇《心動警報》43歲女星韓高恩亦被爆喺38年前，即佢5歲時父母委託熟人借咗3千萬韓圜（約21萬港元）貸款後就失去聯絡，之後韓高恩就移民美國。對於父母涉詐騙，韓高恩親自回應指曾於上月底收到有關信件，對方要求韓高恩給予其父嘅聯絡方式，但因為本身韓高恩冇同父親聯絡20多年，只係喺母親喪禮上見過。

韓高恩亦無奈公開家庭狀況，指移民美國後，父親就已離開家人，佢哋過着艱難嘅生活，從學生時代開始就冇受過父親嘅任何支援，即使出道後，亦因父親各種債務問題，喺拍攝現場受到威脅，同時替父親還債等。韓高恩話：「雖然公開我個人嘅家庭史有些困難，但我對因韓高恩父親而長期受到傷害嘅人們表示歉意，所以寫了這篇文章，不論理由如何，我哋會努力與受害者進行解決。最後我再次對今次爭議表示道歉。」

另外，現時播映中嘅韓劇《皇后的品格》嘅69歲女星朴元淑亦被指於1993年和前夫金某向朋友借咗1億8千萬韓圜（約126萬港元）後冇還錢，但朴元淑方面就話冇借過，而該名朋友則以損害名譽罪起訴朴元淑。
 
 相關新聞連結：
 【韓流】輝人@MAMAMOO父親被指控唔找數 Microdot父母涉詐騙
https://bit.ly/2KRJTBu
 
【韓流】父親涉詐騙 Tiffany代父還債已斷聯絡七年
https://bit.ly/2zKshn0
 
【韓流】Microdot父母涉詐騙後移民紐西蘭 韓警方：唔可以強制遣返
https://bit.ly/2PpmXKV
 
【韓流】Rain父母被爆欠債30年一直唔還 跟債主就還款金額出現分歧
https://bit.ly/2Qo1XIO
 
精選韓流，喺晒《娛果》
http://fb.com/appledailyent