舊年《歡樂滿東華》畀網民勁插卡士弱，今年王賢誌升呢做咗東華主席，即刻碌盡人情卡狂搵大卡士撐場，除咗搵到曾志偉同無綫破冰做司儀之外，仲有謝賢、狄波拉、徐小鳳、林子祥(Lam)、陳秋霞、楊千嬅、楊盼盼、馮寶寶、陳曉東、莫文蔚做嘉賓。

小鳳姐唱《風雨同路》，令觀眾回味，但另外一樣有睇頭項目，係港姐同亞姐及華姐冠軍一齊行catwalk，今晚亞姐冠軍黎燕珊、羅霖、陳煒同韓君婷，港姐冠軍向海嵐、楊思琦、馮盈盈、陳庭欣、陳曉華，以及華姐冠軍鄧佩儀同余思霆，喺林子祥唱《最愛是誰》及《分分鐘需要你》時着住靚衫行catwalk，余思霆同陳煒都低胸裝出場，但薑係老嘅辣，當羅霖着住低胸裝以「岩石胸」現身時，即時將所有冠軍佳麗比下去，成功搶盡風頭。

之後一班靚女攞咪傾偈，原本鄧佩儀遞支咪俾余思霆講嘢，點知馮盈盈竟然搶咗余思霆支咪，結果因為時間唔夠，余思霆同陳曉華都冇機會講說話。