各大發展商嘅賣樓部阿頭都有個人風格，最出名當然係長實地產（1113）「樓神」趙國雄，成日玩百變形象，恒地（012）林達民就執到最有型現身，要講「金句王」就肯定係九建（034）賣樓部阿頭楊聰永。
楊聰永幾乎每次現身都拋低幾句「驚人言論」，創意方面，拋離一班長年累月照稿讀嘅行家幾條街。

「顛覆性」助住戶活得健康

好似噚日九建有個新盤開示範單位，設計來來去去咁上下，冇乜話題性，但楊聰永都展現出非凡嘅說話技巧。佢介紹廚房設備時話「淨係單憑呢個蒸爐都改變咗香港物業市場，（其他新盤）都係送微波爐」，形容呢種改變直頭係「顛覆性」，可以幫到住戶活得更加健康咁話。
查實家陣買樓送廚房爐具係好基本，甚至可以話係應份，唔送先至係新聞，而廚房包埋名牌蒸爐都唔係第一次見，好似新地（016）、華懋同宏安都有，有啲甚至乎進化到二合一焗蒸爐，所以楊聰永呢次話嘅「顛覆性」改變，好似有啲少落後囉。
楊生出名語不驚人誓不休，師承長實地產投資董事郭子威，後者同樣以言行出位而街知巷聞，兩位曾經拍住上賣大圍名城。
不過華華都幾鍾意楊生呢類，冇咁悶吖嘛，需知道好多賣樓部阿頭都係照稿讀，或者拎住塊板影完相，賣完藥就鬆人，記者會完場只得3隻烏鴉飛過。

李華華
mailto:[email protected]

97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk