真人版《進擊的巨人》今日喺東京舉行日本唯一一場首映禮,導演樋口真嗣率領三浦春馬、水原希子、石原聰美、長谷川博己、本鄉奏多同埋三浦貴大等一班演員出席。活動現場設置大型巨人,又用煙光效果,今次首映禮足足花費咗約4000萬日圓(250萬港元)。
提到早幾日《進擊的巨人》喺紐約辦過首映,三浦春馬同水原希子提到當時反應好好都好開心咁話,三浦春馬話:「平時只係透過電影同新聞接觸到荷李活,今次能夠首次踏足荷李活,仲見到咁多fansCosplay嚟捧場,真係好開心。」
水原希子亦講佢同三浦見到反應咁好都感動到想喊,而本鄉奏多就讚導演好似多啦A夢咁萬能,導演樋口真嗣即刻扮卡通聲講多謝。
講番拍攝時花絮,長谷川博己就憶起拍吊威也戲份嘅恐怖回憶:「當時由工作人員拉住威也,我喺半天吊時佢哋突然鬆手,令我向下跌,真係驚到以為自己會死。」