黃曉明同Angelababy（楊穎）婚後各自工作忙碌，冇咁快可以甜蜜旅行，不過前日兩公婆合體，現身曉明家鄉山東青島。

據悉兩公婆一齊探望曉明外婆，翌日就帶住大批愛心物資探訪長者陸奶奶，只因當時老人家講咗句：「你娶媳婦的時候一定要給我看看啊。」原來今年大年初二，黃曉明同Baby帶住年貨到青島探陸奶奶，仲陪對方食年夜飯，Baby甚得陸奶奶歡心，又話每日都準時睇佢電視劇。

探望老人家之後，黃氏伉儷帶住十幾箱愛心物資，駕車到沙梁小學探望小朋友，沙梁小學係黃曉明攜微塵基金捐建嘅博愛小學，曉明仲宣佈要捐贈30所博愛小學，捐款達到150萬，並且為散布喺博愛小學裡嘅300個「關愛寶貝」，提供金額達52萬救助。據悉，僅此兩項，黃曉明夫婦喺山東就捐出逾200萬元善款。