今晚就係吳浩康（Deep）喺九展Star Hall舉行《LISTEN TO DEEP LIVE 2017》演唱會，由一場加到兩場，為保留實力同練歌操弗，Deep就連fb live都停埋。

大家都對Deep寄予厚望，Deep亦非常緊張，但估唔到喺呢個時候「出事」——有人走數。

前日（7號），Deep喺facebook寫道：「絕不再幫人訂飛同俾咗錢先，而家我隨時要貼十幾萬！」hashtag係「請Share」、「要飛請找我」、「我自己演唱會」、「我有大量9號門票」。換言之即係，Deep應承幫人hold佢自己演唱會嘅飛，而且係大量（貼十幾萬喎…）但對方（s？）走數，咁即係呢條數要由Deep自己孭番。

Deep出post後，不少網民熱烈回應力撐，又鬧爆「飛機友」（s？）當然馬上留言認購者亦不乏。有網民問：「咁有幾多飛喺手？」Deep覆：「200。」佢個fb亦變身「演唱會購票平台」，叫有意買飛嘅人PM佢。

今日就係9號喇，咁啲飛解決咗未？

進入最後倒數，啱啱排完舞嘅Deep，今午在fb拍片交代最新情況，佢話：「其實前幾日我哋有個小插曲，喺發生嘅時候令我好激心，但依家令我非常感恩。一件令我好擔憂嘅事，變咗一件令我好窩心嘅事。無論係我自己公司同事我經理人我助手我朋友，支持我嘅朋友，一知道我有困難，都即刻衝出嚟，310張飛基本上呢一兩日透過大家嘅支持同努力，已經賣晒。再一次喺度對於12月10號我真係俾唔到佢嘅朋友，我真係sorry。希望大家可以等到我，我明年會再開，喺一個更加大容納到更多人嘅場館。」

Good Show呀！