精電（710）上個月宣佈，計劃引入京東方（深：000725），做精電大股東。京東方市值過千億港元，係精電市值嘅53倍！博成壇製作順風順水，精電俾強勢大股東湊到肥肥白白！
精電引資京東方通函，已喺噚日寄發，兼喺下月21號SGM議決。計劃中，精電配售4億新股畀京東方，原大股東兼掌舵高振順權益，會攤薄到得約7.5%，京東方揸精電54.7%，成大股東。

京東方市值過千億

承配人京東方，主打瓣數之一，一樣包括TFT顯示屏，兼且係全球主要供貨商之一，市值高達1,057億港元。精電成間公司市值，都係得19億元，細奀到痹。
諗到係，京東方同精電業務瓣數同，加埋大孖沙級數，成功坐正做大股東，絕對有機會湊大精電。又精電計劃喺呢壇製作搞掂後，每股派特別股息1.35元。連呢板潛在除息效應粗略計數，街貨市值得12億元，呢個size，又算係乜？
精電現價5.74元，計劃派發特別股息息率達到23厘，場內呢期同樣派特別股息嘅，有神州數碼（861），半年累升咗44%，呢兩日兼創埋半年新高。
精電上年純利增長20%，家陣得6倍PE，比本身十年嚟平均12倍PE，平咗半。潛在新主京東方，講緊33倍PE，精電又係平咗大大截。條數咁計，博精電成壇製作搞掂，京東方跟手湊大，當現價5.66元翻半番到8.6元計數，精電PE都係得9.5倍，仲未上番十年平均值，連埋新增發股份計算市值，都係得64億元。

錢雋
細價股專家
本欄逢周一、三、五刊出