今屆立法會選戰，除咗地區直選多人爭，功能組別都成為一班民主素人進攻目標，好似飲食、批發零售界等建制霸住嘅位，一樣有民主素人想出戰。不過原來一向封閉、由商界自己友玩晒嘅商會功能組別議席，一樣有暗湧，最近江湖傳出，由總商會選出嘅商界（一）議席，現任議員林健鋒會有人挑戰，更有傳呢個人係「魔童」之稱嘅王維基。

呢個消息最初係政、商界圈子流傳，之後就有個fb專頁「沉默是銀」爆料，話中聯辦打鑼幫林健鋒拉票，要求好多同時係香港總商會會員嘅中華廠商會會員，將佢哋公司嘅界別轉去商界（一），目的就係幫林健鋒箍票。

太太袁莎妮有優勢

咁王維基係咪真係會選？八方搵過王維基，但佢就只讀不回。有傳媒引述知情人士，話佢暫時冇咁打算，不過有同魔童相熟嘅人同八方講，王維基佢係反送中期間好積極，又號召保衞中大，佢亦知王維基對今時今日政局、甚至立法會選舉有好多睇法，笑言「即使佢𠵱家話唔選，如果幾個月後忽然又話選，我都唔會意外」，佢又話其實王維基參選有好多選擇，唔一定要去總商會，好似進出口、批發零售界都得，所以魔童即使想選，仲可以慢慢諗。佢反而真係聽過有人提過，不如搵王維基太太、總商會前總裁袁莎妮去選商界（一）可能仲好，事關袁莎妮喺總商會做總裁時候，能力得到唔少會員認同，再加上雖然唔少總商會會員想換咗林健鋒，但都想搵個各方接受嘅人選，袁莎妮呢方面就比王維基有優勢。

不過王維基肯唔肯畀太太咁辛苦？袁莎妮又肯唔肯有少奶奶唔做走去對住班議員同官？又係另一回事！

李八方