謝天華近排可謂人氣爆燈，佢喺無綫劇《學警狙擊》扮演卧底Laughing哥，因為入型入格演技出色，成為劇中最搶鏡一個。上星期五（27號）播映嘅《學警》大結局中，Laughing哥翻生一幕掀起全晚高潮，帶嚟43點高收視，約274萬觀眾收看；平均收視34點，約216萬觀眾捧場，成為09年暫時收視最高嘅劇集。
謝天華噚日喺電話度話：「好開心，真係奇蹟，我冇諗過咁犀利。」對於有觀眾同網友批評結局無厘頭，天華話：「唔求其，我相信編劇諗過先有咁嘅鋪排，壞人冇好報。」問天華滿唔滿意Laughing哥復職嘅結局？佢話：「都鍾意，呢個鏡頭大家睇完可以有唔同嘅意會空間。」

新劇要替身揸車

噚日天華喺將軍澳為新劇《老公萬歲》開工，對於超過15萬觀眾喺網上簽名要求下輯《學警》應擺重Laughing嘅戲份，問天華知唔知幾時拍下一輯，佢話要等公司安排，仲話：「希望到時做番警察，但係就以Laughing哥嘅風格查案。」因醉駕而被停牌嘅天華喺新劇中有揸車鏡頭，屆時佢會由替身上陣。
此外，梁嘉琪噚日出席活動，佢話都想參演下一輯《學警》，佢話：「柏翹（陳鍵鋒飾）個個伴都死，我希望可以連續出現喺新一輯，打破佢嘅宿命。」