可能大家會嫌座落黃竹坑嘅港怡醫院唔就腳，未必留意醫院動向；之但係港怡除咗有好多港大名醫坐鎮，膳食服務亦相當講究，主打星馬菜式例如肉骨茶、喇沙、海南雞飯等，所有廚師都要先去新加圾學藝。唔止飯堂質素好，主廚話連病房餐都唔係一早整定，係「即叫即整」，務求帶最好嘅味道畀病人。

唔講唔知，港怡醫院嘅主廚盧國錦，係前九龍香格里拉同酒店廚師，東南亞菜、西餐都非常拿手，但佢都話，嚟到港怡，公司都特別安排佢去新加坡學藝，將最地道嘅風味帶入港怡醫院。今日港怡醫院搞傳媒聚餐，一口海南雞飯、迷你喇沙食到成班記者冇停口，盧主廚自然開心。

除此之外，盧主廚都提到其他醫院嘅病人餐，一般都係早上甚至更早就準備，但佢哋就精益求精嘅作風令佢都深感佩服。選擇「即叫即整」，當營養師決定菜單，一日病房未嗌要餐，佢哋都唔會預先煮，確保膳食質素最好，「病人要住醫院已經好慘，唔食番啲好嘢點會開心？」究竟港怡膳食好到咩地步？淨係聽企喺主廚隔離嘅港怡營運總監邱家駿醫生，猛豎起手指公讚喇沙「冇得頂」就可見一斑。

除咗讚食物好，邱醫生同行政總裁Dirk Schraven仲宣佈，出年上半年會喺中西區開設專科門診中心，不過會唔會衝出港島區就未諗。