台灣女星林依晨於2014年年底同老公林于超舉行婚宴，翌年正式註冊結婚，眨眼已過4年，呢位人妻最近接受台灣時裝雜誌訪問，提到2019年願望清單，「生小孩」排第一，現年36歲嘅林依晨話覺得o依家經濟狀況比較穩定，心智亦夠成熟，所以時間啱啱好。

雖然暫時都未有好消息可以公佈，但林依晨一早就已經想像自己陪子女成長嘅場景，佢話自己會喺有生之年，同仔女一齊經歷失戀之痛，面對人生各種嘅酸甜美好，亦希望透過生命經驗，可以重新了解自己。

林依晨又喺訪問中分享夫妻相處情趣，就係無端白事都會互送禮物，甚至會手寫卡俾對方，林晨自嘲係個「老派」人。林依晨又話自己同老公好好傾，至於因為合演而同自己成為男閨密嘅鄭元暢、陳柏霖同胡歌，林依晨話自己為咗怕老公擔心或亂諗嘢，所以已經冇晒男閨密。

另外，林依晨提到今年仲有啲咩想做，包括喺海邊執垃圾淨灘、用鋼琴彈一首歌，攞進階潛水執照，同好好學法文。

精選娛聞，喺晒《娛果》
http://fb.com/appledailyent