日前不少國內醫藥股當炒，或與發改委本周宣布調整成藥價格後，降價潮屆尾聲有關，睇升幅榜，精優藥業（858）升30%，維奧生物（1164）升20%，曼盛生物（512）升18%。3隻異動股之中，曼盛已經連續5年蝕錢，若喺中國早已除牌，喺香港醫番都嘥藥費，精優好少少，但往績PE都成495倍，得維奧生物真係抵買，過去5年盈利穩定，營業額年年都有增長，往績PE僅12倍，炒行業復蘇呢隻係首選。
中國生物製藥（1177）日前公布截至今年3月底止首季業績，期內純利3216萬元，增長16.4%，每股盈利1.42仙，本來業績增長並無值得驚喜之處，不過作為一間非藍籌公司，近年開始經常派季息，今次又派季息每股1仙，值得鼓勵。

呢間公司主營產品為治肝病用藥品，佔銷售總額58%，心腦血管用藥的銷售則佔營業額約兩成，05年推出市場的鎮痛藥，由於基數低，故錄得增長6.36倍。純睇主營業務睇唔出玄機，要睇睇公司去年度業績，純利大幅倒退9成，先至估到應該係公司前年出售業務獲厚利。原來前年公司將旗下眼藥水廠售予博士倫並獲利14億元，亦因此公司首季淨持現金高達17億元，絕對有能力學大藍籌派季息。
不過既然係沽出資產獲利，照計應該去年就派特別息回饋股東，唔肯派可能係同去年進軍煤化工業有關。集團去年底斥資逾7億元與陝西省政府合作在榆林市建立中國首個煤烯烴項目，所謂煤烯烴亦即係煤代油嘅化工產品，呢項業務日後可能好值錢，但要兩三年後起好廠至知。