亞視男藝員梁景煌（Tommy）喺今日出版嘅雜誌爆料，指亞視投資者王征喺深圳寓所內，向佢上下其手，甚至話王征揸佢下體。

Tommy喺訪問內憶述，佢自己當時因貪圖一紙藝員合約，就同王征發展關係，當年佢又確係一登龍門，由奀星變成「新寵」，點知好景不常，付出得不到回報，除咗僅一份每月底薪嘅6千元合約，更慘被拖糧9個月，現時Tommy為咗生計，要喺茶餐廳做清潔幫補。

Tommy表示當初同王征發展關係後，對方更帶佢去上海見家長，兩人升呢做密友，最後Tommy亦如願以償能簽長約，佢喺訪問中表示：「我陪完王征去上海，上埋洗腦課程，2013年年中就有份月薪六千元長約畀我，仲有得做兒童節目主持。」

Tommy又話當時出席活動要自備衣服，但升呢後服裝間有好多衫畀佢揀，更被服裝間阿姐封佢做「老闆娘」。

可惜好景不常，Tommy呢個厚待，僅維持兩個月左右，同年佢參加Mr.Gay比賽後，就被公司雪藏，佢話合約冇講明唔畀佢參賽，點知參加完後，亞視就停咗佢工作，佢喺微信搵王征，對方連佢個名都刪除。

Tommy爆料指簽約後，亞視只出過三個月糧畀佢，仲欠佢九個月人工，Tommy自嘲有種「用完即棄」感覺：「我覺得自己仲衰過避孕套。」

除咗Tommy外，原來仲有其他亞視男藝人中招，人稱「班長」嘅李明憲，於09年參加首屆《亞洲星光大道》入行，喺2011年離開亞視，都曾被王征毛手毛腳。