要講最多小股東參與又最快開完會嘅股東會，中華煤氣（003）肯定數一數二。煤氣噚日喺灣仔會展訂咗兩個大堂召開股東會，有超過1,700名小股東到場，佢哋對主席李兆基（四叔）仲好好，一條問題都冇，就連煤氣費走勢都冇人問！

轉頭排隊攞點心

煤氣噚日中午12點舉行股東會，華華喺12點05分仲見到一百幾十名小股東排隊登記入內，非常之墟冚，煤氣要分兩個大堂開會，一個見到四叔等一班管理層真人，另一個大堂只係望直播電視，兩個大堂都超多人，估計入座率有八、九成。
管理層一路讀議程，去到12點10分已經讀完晒，問現場股東有冇提問，根據其他上市公司股東會嘅經驗，小股東通常有大把問題，起碼問半粒鐘，煤氣嘅業務咁貼身，斷估總有人問煤氣費會否調整啩，加價有助提高公司盈利喎，點知小股東一條問題都冇，令呢個股東會極之順利完成，約15分鐘就散會。
小股東趕住散會當然有「急事」喇，管理層未話散會，佢哋已經好似熟晒地頭咁，一窩蜂湧去排隊攞煤氣為大家準備好嘅九格點心禮盒，現場見唔少人至少一人拎兩、三盒，有人即刻搵位坐低當食晏，有人就全部拎走，華華聽見有位女股東邊行邊打電話叫家人唔使煮佢飯㖭！
查實中電（002）上月初舉行股東會有1,230名小股東出席已經唔嘢少，煤氣有超過1,700人，比舊年多100人，四叔果然多粉絲。

李華華
mailto:[email protected]