勝出九西立法會補選嘅民建聯鄭泳舜以攬吓爸爸一攬成名，身兼民主黨副主席嘅沙田區議員李永成（Wilson）亦不相伯仲，經常親親媽咪，但佢唔使黨內元老教路，都好自然咁同媽媽抱抱，皆因佢喺單親家庭長大，感激媽媽不辭勞苦將佢湊大佢，區選兩次敗選都起得返身，媽媽嗰種堅毅影響至深，所以而家就算幾忙，佢逢周日都同媽媽同婆婆飲茶，「喺佢身上我學識『愛』」。

今年43歲嘅Wilson幾個月大，父母就分開咗，對爸爸完全無印象，身為獨子嘅佢話唔孤獨，因為有幾個舅父陪佢，形容係奀皮仔通街走，「試過有次碌落山，婆婆同公公幫我手手腳腳搽晒藍藥水，突然變咗『blue blood』，哈哈。」

而佢其實喺屋邨大，橫頭磡邨住到小四搬入沙田。小學讀聖博德學校，興趣一籮籮，加入咗羽毛球丶乒乓波同足球校隊；中學去咗何明華會督銀禧中學，係何俊仁師弟，自嘲「其實我嗰時係專心打波」，因為喺上述三種球類運動外，再加入埋籃球隊。轉去馬鞍山青年會學院讀預科時搞埋話劇組，攞過校際優異導演獎，沙田戲劇節更提名過最佳演員，校內歌唱比賽又勝出過，「我冇乜嘢冇興趣，咁先至大鑊，哈哈。」

港大讀化學，開始上莊辯論學會，負責搞比賽，大三親身上陣參加辯論，打過兩大賽兼攞牌，令佢越嚟越關心時事，「訓練過程令我相信，道理同真理愈辯愈明」。佢話讀到大二已經覺得「我都唔係科學家」，有諗過畢業後教書或從事傳媒教育工作，指六四事件對佢影響好大，「當年屋企有50幾盒錄影帶，錄低六四嘅報道，嗰時開始有要捍衞民主自由嘅概念。」

98年畢業後第一份工係做時為立法會議員嘅鄭家富議員助理，兩年後轉去出版社工作，05年幫劉慧卿搞地工作，直至16年卿姐卸任議員前都係卿姐辦事處總幹事。07年區選前兩個月臨危授命替補民主派上陣，喺沙田第一城落敗，2011年喺北區粉嶺華都不敵建制鐵票，至2015年終於喺烏溪沙擊敗建制派吐氣揚眉，三戰後終於取勝，Wilson多得媽媽教曉佢要堅毅，亦好感謝選民，「贏咗唔係代表我好巴閉，係代表咗選民選擇民主派多過建制派，我好感激佢哋信任地選擇咗我做代表。」

《蘋果》沙士15周年系列網站，正式登場： https://hk.feature.appledaily.com/sars15/ 。