20歲嘅麥紫莉(Chili)之前就大鑼大鼓咁話要進軍日本AV市場，但只聞流水嚮，一直未有下聞，但原來佢要下海嘅原因，係要40萬嚟救病母，實情佢係一名孝女(新聞連結： http://bit.ly/2vYsbDu )，但圈中孝順嘅藝人，又豈止Chili一人呢，過往好多藝人都曾為家庭而加入呢個演藝大家庭。

謝霆鋒
今年霆鋒就好闊綽咁斥資8500萬買咗間豪宅送畀爸爸謝賢（四哥），做父親節禮物，但原來當年就傳過霆鋒出道係代父還債㗎！當時係咁講嘅，有指謝賢九六年以二千八百萬元購入紅山半島一個單位，並將物業按給英皇分三年還錢。而霆鋒喺02年，接受台灣名主持人張小燕嘅節目《小燕有約》訪問中，霆鋒話：「我十六歲正式進入娛樂圈，我爸爸當時跟我說，我和你媽會離婚，以後你的生活就是你的，我不是給你壓力，但現在我只剩下兩萬塊錢，你去努力吧！他送了我兩個字『執生』，這樣我就入行了。其實在我十五歲簽這間公司之前，有八間公司開出來的條件、年數和版稅都比這一間好，總之家家有本難念的經。」(新聞連結： http://bit.ly/1NMIloc )

李彩華(Rain)
33歲嘅李彩華，今年書展就推出寫真賀吓自己入行十七年，但原來阿Rain16歲出道時，就要孭起老竇逾百萬嘅債務，但係阿Rain之前接受傳媒訪問，話當時年紀比較細，仲讀緊書，但有兼職做模特兒搵到錢，當時媽咪同佢講屋企發生咁嘅事，要幫爸爸手還債，要將戶口嘅積蓄同埋打工嘅錢攞晒出嚟，但係阿Rain話自己冇怨過爸爸，後來佢返大陸發展，憑劇集《 回家的誘惑 》彈起，勁賺人仔，成為圈中嘅小富婆。

林依晨
台灣女星林依晨，5歲時，父母離異，由媽媽照顧佢同細佬，到佢17歲時，佢知道媽媽為養家而欠下500萬台幣(逾百萬港元)，依晨就同媽媽一齊孭起呢啲債務，但迫使依晨入行嘅，原來係因為佢細佬嘅電腦壞咗，依晨冇法可施下，就為咗3萬蚊台幣獎金參加電視台嘅選美比賽，依晨仲得到冠軍，就係咁佢就加入咗娛樂圈喇！

楊丞琳
依晨嘅好姊妹楊丞琳都係為咗幫屋企還債而加入娛樂圈。楊丞琳14歲時，父母瞞住佢同家姐辦了離婚手續，16歲時，才知道父親因生意失敗，欠下900萬台幣(逾200萬港元)，當時佢就決定自己一力承擔呢筆債務，雖然當時丞琳演戲一集只有5至6千元(台幣)嘅酬勞，但至少有穩定嘅收入助她慢慢還債，直到2005年推出《曖昧》專輯而爆紅，花咗兩年還清所有債務。