【新增動新聞】

香港時間禮拜一凌晨嘅2018年俄羅斯世界盃歐洲區外圍賽A組賽事，真係可以話震驚唔知幾多億人，堂堂法國居然係自己地頭俾世界排名低自己126位嘅盧森堡悶和0:0，爆出足智彩90倍嘅「0:0」波膽。賽果或者影響球隊直接攞到世界盃決賽周席位唔在講，無面果下先緊要吖嘛！

根據《Sporting Intel》嘅統計，法國今場正選陣容嘅球員合共身價係4億鎊，即係大約40億港紙，對面盧森堡正選陣容嘅球員身價，夾埋只係得27,720鎊，即係280,000港紙左右。兩隊身價差距講緊係14,430倍，呢樣嘢亦都喺今場波嘅戰況反映出嚟。法國全場控球率有76%，起腳射門34次，比作客嘅盧森堡多31次，不過射門中框次數就只係得九次，比起盧森堡射三次有一次中框嘅命中率仲要低。

法國以前贏過世界盃，仲係兩屆歐洲國家盃冠軍，盧森堡唔使講梗係乜都無贏過。就算計埋歷史對賽成績，兩隊對賽18次，法國嘅戰績都贏到開巷，贏16場和一場輸一場，輸嘅唯一一場仲要係1914年、即係103年前嘅事。至於打和果場？咪就係嚟到今日先至咁羞家囉！