日本型男竹野內豐今日連同松雪泰子等演員，去到東京新宿一間戲院為電影《atHome》舉行謝票活動。今次竹野內豐仲係做人老竇，同松雪泰子扮演有一對仔女嘅夫妻，表面好幸福咁，其實成家人都係假扮嘅賊人！竹野內喺戲入面嘅仔女，分別由黑島結菜扮佢個女，童星池田優斗就扮佢個仔，竹野內話套戲係一年前拍，今日見番一對仔女，話佢哋已經大個仔大個女咗好多，口吻都好似老竇咁。

不過，竹野內講到黑島結菜時話：「一段日子冇見，成熟咗好多……」之後突然停咗落嚟，唔知講乜，竹野內搞笑咁話：「我個人真係好慢，我諗家大家都想叫我快啲講嘢啦，真係唔好意思。」導演講到拍攝時竹野內都好似教仔咁，竹野內又好似唔記得咗自己講過啲乜咁話：「我……有講過咩？」儍吓儍吓嘅佢，引到在場觀眾大笑。