今時今日，形象呢家嘢真係好重要，尤其你係市場焦點嘅時候，真係唔可以唔理形象。好似喺美國搞緊上市嘅阿里巴巴，近日就宣佈，聘用曾經做過美國前財長保爾森幕僚長及辦公室主任嘅Jim Wilkinson，做集團國際企業事務部主管。
睇番資料，呢位占sir唔講得笑，除咗喺金融海嘯期間做過保爾森嘅幕僚長，之前佢亦做過美國前國務卿賴斯嘅資深顧問。喺政治舞台有往績之外，占sir亦做過全球商務諮詢公司Brunswick Group嘅揸fit人，2012年就加入百事可樂，如此履歷，怪唔得馬雲會出手招攬。
阿里除集資額勁，公司仲有極具爭議性嘅合夥人制度，加上阿里嘅淘寶不時有翻版貨出售，上市前後都一定會係市場焦點。

阿里前公關「被調任」

馬雲請得美國前高官占sir做大公關，肯定係想利用佢嘅人脈關係，阿里解決上市時可能會出現嘅政治障礙。
市場舊年傳出阿里有意上市，管理層堅持要用合夥人制度就搞到香港滿城風雨，好多人覺得阿里好野蠻，甚至話馬雲霸道，絕對係一場公關災難。可能因為咁，一直係阿里公關阿頭嘅John Spelich已經「被調任」去做國際電貿部副總裁。
除咗占sir，阿里亦從偉達公關香港撬走大中華地區財經傳訊主管陳嘉寶（Rachel）出任阿里事務副總裁，負責阿里香港同海外華人市場嘅公關工作，睇嚟馬雲最終知道公關嘅重要性了。

李華華
mailto:[email protected]