網上近日流傳，《願榮光歸香港》成為了將軍澳翠林邨街市禁歌，事緣有街市商戶員工在Facebook控訴，在自己餐廳內播歌時被管理處職員惡言對待，並命令他把播歌喇叭關掉，令他不禁慨嘆：「原來，香港無自由到，連聽一首歌都唔得。」

餐廳員工柯先生表示，他於今年四月入職，主理食物出品及水吧工作，每天大約四時許，餐廳結束營業時間後，他會開始清潔洗地的工作。那段時間，由於餐廳所有客人已經離開，街市人流疏落，他慣於把手機用藍芽接駁餐廳喇叭聽歌，這做法始於四月至今，一直相安無事，亦未接獲任何人投訴。

直至上星期，他如常在清潔時開著喇叭，當播至《願榮光歸香港》時，被街市管理處職員阻止。他表示，當歌曲播至尾段，響起「光復香港，時代革命」等口號時，自稱商場管理處主管的李先生向他走近，大力踢餐廳門口，並喝令他把音響關掉：「佢同我講，我係呢度商場嘅主管，我覺得你滋擾到人就係滋擾到人，我唔鍾意唔租俾你都得。當時我只係打咗個突，咩反應都俾唔到，原來，香港無自由到，連聽一首歌都唔得。」

柯先生表示，由於自己正在進行洗地工作，手上拿著水喉，所以當李主管踢門時，被他的水喉不慎弄濕：「有人踢你度門你自然會轉身，水喉射濕咗佢，佢就用粗口問候我，跟住唔夠兩分鐘，就有兩個佢嘅下屬一齊圍住我，我問：『你依家係咪唔俾我走，你哋有冇權圍住我唔俾我走？』佢仲答我一句：『我係呢度商場主管，我有權唔租俾你哋都得，都有權唔鍾意邊個入嚟，就可以唔俾佢入嚟。』」

柯先生表示，自己曾經詢問過李主管，影響到那一個商戶，但未有得到回覆：「如果我真係滋擾到人，我可以同大家道歉，但如果喺我冇滋擾到人，你唔俾我聽歌，咁會唔會真係好唔公道？」

對於以上事件，本刊找到當日與柯先生起衝突的李姓主管，對於柯生的所有指控，李全部否認：「我一路行過去，聽到好嘈，咁我就話：『唔該，將音量收細啲』其實唔係我聽見，當時在場好多人都聽見。我冇話過唔租俾佢，因為佢唔係老闆呀嘛！」問到是那位租戶投訴太嘈，他表示是行經的街坊，不是附近租戶。至於是否不能聽有政治意思的歌曲，李生否認，並謂自己政治中立：「我立場就係中立，我哋都嗌光復香港啦，有咩問題呀，嗌香港加油有咩問題呀？」不過，記者發現管理室壁報板上的公司宗旨，貼有，『習近平的說話』及『林鄭月娥的金句』。

對於喇叭的聲響問題，本刊訪問過在柯生旁邊幾檔商戶的員工，他們均表示聽到餐廳喇叭的音樂，但聲量可以接受，亦從未投訴過。

這場禁歌風波，柯生感受至深：「只不過係一首歌，我上唔到前線幫唔到幫後生仔，我係想聽首歌，等啲後生仔行過聽到，知道有人默默支持佢哋，佢哋唔孤單，只係咁簡單。」他指，接受訪問之前，想過要求打格遮樣，但最後亦選擇以真面貌示人，原因是他認為面對不公，應該勇敢站出來：「一班後生喺出面同我哋搏緊命，我哋喺呢個時候遇到唔公平嘅事，仲遮樣嚟做乜，多啲香港人企出嚟，為我哋香港人拎返個公道。」

-----------------------------

【你爆料，我課金！】

爆相：$500　 爆片：$1,000

分清黑白 壹齊揭穿社會黑幕！

詳情： https://s.nextmag.hk/e/zg7VUk287Z

-----------------------------

【壹週刊Telegram，與港人同行，每日為你推送抗爭現場實況】

一手報料： https://t.me/nextmaghk

最新消息： https://t.me/NextPlushk

-----------------------------

【升級壹會員登記站 為你解疑難！】

沙田、旺角、荃灣、觀塘、銅鑼灣5區為你服務

詳情： https://s.nextmag.hk/e/Tssefy687Z